Макрон Вестфаль тинчлик мукофоти билан тақдирланди

Франция Президенти Эммануэль Макрон 2024 йил учун Халқаро Вестфаль тинчлик мукофоти билан тақдирланди. Бу ҳақда кеча, 18 апрель куни Вестфалия ва Липпе иқтисодий жамияти (WWL) маълум қилди.

Билдирилишича, тинчлик мукофоти Франция раҳбарига “Россиянинг Украинага бостириб кириши бошланишидаги можарони тўхтатиш бўйича тинимсиз саъй-ҳаракатлари” учун берилди. Мукофот лауреатга Германияга ташрифининг учинчи куни, 28 майда Мюнстерда топширилади. Сафар давомида Макронга Вестфаль тинчлик мукофоти ҳакамлар ҳайъатига раҳбарлик қилувчи Германия Президенти Франк-Вальтер Штайнмайер ҳамроҳлик қилади.

Маълумот учун, Халқаро Вестфаль тинчлик мукофоти 1998 йилда Мюнстер ва Оснабрюк шаҳарларида вайронагарчиликка олиб келган Ўттиз йиллик урушдан кейин тузилган Вестфаль шартномасини (1648 йил) хотирлаш учун таъсис этилган. Мукофот ҳар икки йилда топширилади. Ғолиб 100 минг евро олади. Бу энг йирик немис тинчлик мукофоти бўлиб, у Европа интеграциясига алоҳида ҳисса қўшган одамлар, ташкилотлар ёки давлатларга берилади.

26 йил давомида мукофот Чехия Республикасининг биринчи президенти Вацлав Гавел, Германиянинг собиқ канцлери Гельмут Коль ва Гельмут Шмидт, Франциянинг собиқ президенти Валери Жискар д'Эстен, БМТнинг собиқ бош котиби Кофи Аннан, Халқаро космик станция экипажи аъзолари, Иордания қироли Абдулла II ва Болтиқбўйининг учта давлати – Эстония, Латвия ва Литвага топширилган.