Мадрид яна Pegasus жосуслик дастуридан фойдаланишни текширмоқда

Испания Олий суди Исроилнинг NSO Group компаниясининг Pegasus жосуслик дастуридан фойдаланган ҳолда Бош вазир Педро Санчес ва бошқа испан сиёсатчиларининг телефонлари бузиб кирилгани иддаоси бўйича терговни қайта бошлади. Бу ҳақда DW хабар берди.

Олий суд баёнотида айтилишича, судья Хосе Луис Калама Франция адлия органларидан янги маълумотларни олганидан кейин терговни қайта бошлашга қарор қилган.

Испанияда Бош вазир Санчесдан ташқари, уч нафар вазир – Мудофаа вазири Маргарита Роблес, Ички ишлар вазири Фернандо Гранде Марласса ва Қишлоқ хўжалиги вазири Луис Планас бузиб кирилгани иддао қилинади.

Тергов 2022 йилда Мадрид ҳукумати Исроилнинг NSO Group дастурий таъминоти вазирлар устидан жосуслик қилиш учун ишлатилганини айтганида бошланган эди. Бу Испанияда сиёсий инқирозни келтириб чиқарди. 2023 йилда тергов Исроил томонидан ҳуқуқий ҳамкорликнинг умуман йўқлиги туфайли тўхтатилди.

Исроил разведка хизматлари ходимлари томонидан асос солинган NSO Group томонидан ишлаб чиқилган Pegasus жосуслик дастури хакерга смартфоннинг овози, камераси ва хотирасига кириш имконини беради.

Қайд этилишича, NSO Pegasus'ни фақат давлат мижозларига сотади ва биринчи навбатда ундан разведка идоралари фойдаланади. 2021 йилда компания Россия дастурни сотиб олмоқчи эканини айтди, аммо рад этилди.