Isroil HAMASga ultimatum qo‘ydi – WSJ 

Isroil HAMASga ultimatum qo‘yib, bir hafta ichida G‘azo sektorida o‘t ochishni to‘xtatish bo‘yicha kelishuvga erishish va garovga olinganlarni ozod qilishni talab qildi. Bu haqda o‘t ochishni to‘xtatish kelishuvi muhokamasi bilan tanish bo‘lgan ismini oshkor etmagan Misr rasmiylariga tayanib, kecha, 3 may kuni Amerikaning “The Wall Street Journal” gazetasi xabar berdi.

“Xabar 2 may kuni HAMAS vakillariga yetkazildi”, deb yozadi WSJ.

Nashrning yozishicha, agar HAMAS kelishuvdan bosh tortsa, Isroil G‘azo sektorining janubiy qismidagi Rafah shahriga oldin e’lon qilingan hujumni boshlashi bilan tahdid qilgan. Isroil bu aholi punktini HAMASning sektordagi so‘nggi tayanchlaridan biri deb ataydi.

May oyining birinchi dam olish kunida Qohirada Isroilning G‘azo sektorida ilgari taklif qilgan sulh bo‘yicha muzokaralar davom etadi. Kelishuvga ko‘ra, HAMAS 7 oktyabrda Isroilga qilingan hujumdan keyin garovda qolgan 30-40 nafar isroillikni ozod qilishi kerak. 2023 yil noyabridagi qisqa muddatli sulh singari, falastinlik mahbuslar ham Isroil qamoqxonalaridan ozod etilishi kutilmoqda.

Qayd etilishicha, HAMAS doiralari kelishuvga “ijobiy” javob berishga umuman tayyor, biroq ular guruhning harbiy qanoti rahbari Yahyo Sinvarning yakuniy qarorini kutmoqda. U G‘azo sektori ostidagi yer osti tunnellarida yashiringan deb ishoniladi va undan hozirgacha Isroil takliflariga hech qanday javob bo‘lmagan.

Aprel oyi o‘rtalarida Amerikaning CNN telekanali HAMAS vakillari 40 nafar isroillik garovga olinganlarni ozod qilish g‘oyasini rad etib, olti haftalik o‘t ochishni to‘xtatish davrida ikki baravar ko‘p odamni ozod qilishni taklif qilgani haqida xabar berdi. Vashington rasmiylari omon qolgan garovga olinganlar soni jamoatchilik taxmin qilganidan ancha kam bo‘lishi mumkinligini ta’kidladi. Ayni paytda, Isroil rasmiylariga ko‘ra, 130 dan ortiq odam HAMAS qo‘lida, ammo ularning taqdiri noma’lum.

Shunisi e’tiborga loyiqki, bundan bir necha kun oldin Isroil Bosh vaziri Binyamin Netanyaxu yana bir bor Isroil mudofaa kuchlarining G‘azo sektoridagi hujumini davom ettirish niyati va kelishuvga erishilish-erishilmasligidan qat’i nazar, Rafahda quruqlikdagi operatsiyani boshlashga tayyorligini e’lon qilgan edi. 

Rafahga hujum kamida fevral oyidan beri tayyorlanmoqda, Isroil bunday rejalari uchun xalqaro hamjamiyat tomonidan tanqid qilinmoqda. Sektorda harbiy amaliyot boshlanib, mintaqa shimolidan bir yarim milliondan ortiq tinch aholi evakuatsiya qilinishi ortidan 1,3 millionga yaqin falastinlik Rafahdan boshpana topdi.

Norvegiya qochqinlar kengashi rahbari Yan Egelandning so‘zlariga ko‘ra, Rafah aholisiga oziq-ovqat va ichimlik suvi yetishmaydi. Muntazam bombardimon qilinayotgan shahar Misrdan G‘azo sektoriga kirib kelayotgan gumanitar yordam uchun asosiy logistika markazi hisoblanadi. Avvalroq Xalqaro sud Isroilga ushbu sektorga gumanitar yordam yetkazilishiga aralashmaslikni buyurgan edi.