... 2018 йил – “Фаол тадбиркорлик, инновацион ғоялар ва технологияларни қўллаб-қувватлаш йили”
МЕНЮ
ONLINE TV

Интервью: Шаҳрам Ғиёсов ғийбатчиларга жавоб қайтарди


18:40, 01.05.2018 Интервью
 5 345

“Энди Ўзбекистон деганда кучли-кучли спортчилар, мутлоқ жаҳон чемпионлари бор мамлакатни билишсин”, дейди Ғиёсов.

Аввалроқ, Рио 2016 Олимпия ўйинлари кумуш медали соҳиби, жаҳон ва Осиё чемпиони Шаҳрам Ғиёсов Миллий олимпия қўмитасига ташриф буюриб, МОҚ президенти Умид Аҳмаджонов қабулида бўлгани ҳақида хабар берган эдик.
 
Учрашувда МОҚ раҳбари Шаҳрамни 2020 йили Токиода бўлиб ўтадиган Олимпия ўйинларида кўрмоқчи эканлиги ҳақида гапирди.
 
Учрашув якунлангандан сўнг Шаҳрам Ғиёсов эксклюзив интервью бериб, келгусидаги режалари ва айрим саволларга жавоб берди.
 
– Айни пайтда Ўзбекистонда спортчиларга эътибор кучайган. Биз учун барча шароитлар яратиб берилмоқда. Ўз навбатида менга ҳам зарур шарт-шароитларни яратиб беришга тайёр эканликларини маълум қилишди. Раҳбарият спортчиларимизни янги даражага кўтариш ниятида. Бундан жуда хурсандмиз. Чунки бундай эътибор ҳар доим ҳам бўлавермаган. Энди биз шунга яраша меҳнат қиламиз.
 
Ортимизда бутун ўзбек халқи турганини сезиб турамиз. Бу бизга қўшимча куч бағишлайди. Учрашув давомида Умид Маҳамаджонович рағбат ҳақида гапириб ўтдилар. Энди натижа қай даражада юқори бўлса, рағбат ҳам шунга яраша бўлар экан.


 
– Одатда боксчилар профессионал рингга ўтганидан сўнг кўпчиликни назаридан четда қоладиганидек тасаввур уйғонади. Масалан, ҳаваскор боксда Олимпия ўйинлари ёки жаҳон чемпионатларида муваффақиятга эришган спортчилар доимо мутахассислар, мухлислар ва ОАВнинг диққат марказда туради. Барча уларни қўллаб-қувватлайди. Аммо, профессионал боксга ўтганидан сўнг “у кўпроқ пул топиш мақсадида ҳорижга кетди” деган турли хил гап-сўз, ғийбатлар пайдо бўлади. Бугун Умид Маҳамаджонович билан учрашгандан сўнг бу борада қарашлар ўзгарганини сездингизми?
 
– Ҳа, ўзгаришлар катта. Биз профессионал боксга ўтдик. Биласиз, барча жойда даража, савия турлича. Масалан, мен Жаҳон ва Осиё чемпиони бўлдим, Олимпиадада кумуш медаль соҳибига айландим. Худога шукр, ҳаваскор боксда қўлга киритилиши мумкин бўлган деярли барча медалларга сазовор бўлдим. Ўз мақсадимга эришганимдан сўнг менга янги чақирувлар, янги марралар керак эди.
 
Бунгача профессионал боксда Ўзбекистондан мутлоқ жаҳон чемпиони чиқмаган. Мен айнан шуни ўз олдимга мақсад қилиб қўйганман. Шукрки, ўз олдимга қўйган мақсадларимга бирма-бир эришиб келяпман. Навбатдаги мақсадим – профессионал боксда Ўзбекистонимиз байроғини кўтариб, мутлоқ жаҳон чемпиони бўлиш.
 
Авваллари, хорижий мамлакатларда Ўзбекистонни Покистон, Афғонистон каби мамлакатлар билан адаштиришарди. Ҳозир эса АҚШда ўзбек эканлигимни кўриб, менга қараб “Рио де-Жанейро?” дейишяпти. Мен ҳам буни тасдиқлайман. Риодаги натижаларимиз сабаб бизни шу тарзда таний бошлашди. Энди Ўзбекистон деганда кучли-кучли спортчилар, мутлоқ жаҳон чемпионлари бор мамлакатни билишсин.
 
– Бугунги учрашувда, МОҚ раҳбари сизни Токиодаги Олимпия ўйинларига таклиф қилди. Шаҳсан ўзингизда яна бир марта Олимпиадада иштирок этиб, энди кумуш эмас, олтин медалга эга чиқиш орзуси борми? Умуман бу таклифга қандай муносабат билдирасиз?
 
– Ростини айтсам, Олимпия ўйинларидан сўнг дарҳол профессионал боксга ўтиш ниятим бор эди. Риода кумуш медални қўлга киритганимдан кейин, “Мен мағлуб бўлдим, энди жаҳон чемпионатида олтин медаль олишим керак, кейин проф рингга ўтсам бўлади” деган қарорга келдим.


 
Навбатма-навбат Осиё, кейин Жаҳон чемпионатида олтин медаль соҳибига айландим. Умид ака билан гаплашиб, менда ўзимга бўлган ишонч янада ортди, далда, ният пайдо бўлди. У киши мени қўллаб-қувватлашини маълум қилди.
 
Энди АҚШда маҳоратимни ошираман. Бу таклиф мен учун бахт десам ҳам бўлади. Риодаги Олимпия ўйинларидан сўнг Тошкентга етиб келганимизда юзага келган муҳитни эсласам, яна бир маротаба Олимпиадада иштирок этиш нияти пайдо бўлмоқда. Бундан жуда хурсанд бўлдим ва албатта таклифни бажонидил қабул қиламан.
 
Бу промоутерлик компанияси билан тузилган шартномага мос келадими?
 
– Ўзбекистондан кетишимдан олдин, МОҚ ва бокс федерациясида Олимпия ўйинларида мендан яна медаль кутишларини айтишди. Шу сабабли, профессионал шартномамга Олимпия ўйинларида иштирок этиш бандини киритдим. Осиё ва Жаҳон чемпионатида қатнаша олмайман. Аммо, Олимпиаданинг лицензион мусобақасида рингга чиқиб, йўлланма қўлга кирита оладиган бўлсам, Токиога бориш имконияти менда бор.
 
Келгусидаги режалар қандай?
 
– Энди 25 май куни АҚШга яна жўнаб кетаман. 3,5 йилга виза олиб, июль ойида навбатдаги жангимни ўтказаман. Ҳозирча рақибим номаълум. Промоутер, менежерларим билан навбатдаги рақибларни кўриб чиқяпмиз. Бизда танлаш имконияти бор. Менга мос келадиган рақиб изланмоқда.
 
– Муроджон Аҳмадалиев билан бир жамоадамисиз?
 
– Ҳа, иккимизнинг менежеримиз ва промоутеримиз ҳам бир. Унинг ҳисобида айни пайтда иккита жангдан сўнг иккита ғалаба бор. Таклифлар кўп. Учинчи жангимиз бир кунда ўтказилади.
 
– Шаҳрам, сизни кўриб хурсанд бўлдик. Фаолиятингизда сизга омад, ғалаба ва зафарлар тилаб қоламиз. Албатта, ўзингиз юқорида айтиб ўтган ниятларингиз амалга ошишига тилакдошмиз. Соғ бўлинг!
 
Эслатиб ўтамиз, бухоролик боксчи Шаҳрам Ғиёсов сўнгги жангини 22 апрель куни венгриялик Габор Горбикга қарши ўтказиб, рақибини очколар ҳисобига мағлуб этганди.
Акмалхон Эшонхонов

Теглар:Шаҳрам Ғиёсов 

Дўстларингиз билан бўлишинг:



Ўхшаш мақолалар


Изоҳлар




Изоҳлар


Биринчи бўлиб ўз фикрингизни қолдиринг!