Туркиялик ҳайдовчи Бухородаги мудҳиш ЙТҲда ҳалок бўлди

Жорий йилнинг 8 апрель кунидан 9 апрель кунига ўтар кечаси соат 01:15ларда Бухоро вилояти Қоракўл тумани, “Солур” МФЙ ҳудудидан ўтувчи “Самарқанд-Бухоро-Туркманбоши” йўналишидаги Халқаро М-37 автомабиль йўлида ЙТҲ юз берган. Бу ҳақда Бош прокуратура QALAMPIR.UZ'га маълум қилди.

Қандим ГПЗ темир йўлининг 2 км.да йўлни кесиб ўтаётган Туркия Республикаси фуқароси Заки Кираж ўзининг бошқарувидаги “Мерседес-бенц” русумли юк автомашинаси билан йўлини кесиб ўтаётган ТЕМ2-5808-рақамли тепловознинг ёқилғи бакига уриб, йўл-транспорт ҳодисаси содир этган.

Натижада, Туркия Республикаси фуқароси Заки Кираж оғир тан жароҳатлари олиб ҳодиса жойида вафот этган.

Мазкур ҳолат юзасидан Қоракўл туман ИИБ томонидан ЖКнинг 266-моддаси 2-қисми билан жиноят иши қўзғатилиб, тергов ҳаракатлари олиб борилмоқда.

Қайд этилишича, тергов ҳаракатлари вилоят прокуратураси томонидан назоратга олинган.

Маълумот учун, олдинроқ ўзбекистонлик талаба Туркияда вафот этгани ҳақида хабар берган эдик.