Грузия ҳудудида Россия ҳарбий кучларининг жойлаштирилишини қабул қилиб бўлмайди – НАТО

НАТО Бош котиби Йенс Столтенберг Брюсселда Европа Иттифоқи Ташқи ишлар кенгашида сўзлаган нутқида Россиянинг Грузиядан тортиб олган ҳудуди Абхазияда ҳарбий-денгиз базасини ташкил этиш режасини кескин танқид қилди. Бу ҳақда Грузиянинг "Civil.Ge" нашри хабар берди. 

“Биз Грузиянинг ҳудудий яхлитлиги ва суверенитетини қатъий қўллаб-қувватлаймиз ва бу ҳудуддан Россиянинг ҳарбий мақсадларда фойдаланишига қаршимиз”, деган Столтенберг.

Унинг айтишича, бу режа "Россия Украинадаги ҳарбий мақсадларига эришиш учун қанчалик узоққа боришга тайёрлигини" кўрсатади.

Аввалроқ, Қора денгиздаги Очамчир портига рус қўшинларининг доимий жойлаштирилиши ҳақидаги хабар Абхазиядаги ишончли манбаларига таяниб, Россиянинг "Известия" нашри томонидан чоп этилганди. Бироқ бу тўғрида ҳали Кремль томонидан расмий изоҳ берилгани йўқ.

Шунингдек, Грузия Ташқи ишлар вазирлиги бу режаларни мамлакат ҳудудий яхлитлигини бузиш деб ҳисоблаб, кескин қоралаб чиқди. 

Абхазияда Россиянинг Қора денгиз флоти учун ҳарбий-денгиз базасининг ташкил этилиши Грузияда Россия-Украина урушининг давоми сифатида, янги можаронинг нишоналари сифатида кўрилмоқда.

Порт Россия Қора денгиз флотининг йирик ҳарбий кемаларини жойлаштириш учун етарлича чуқур бўлмаса-да, у энг муҳим логистика марказига айланиши мумкин. Айрим экспертларнинг фикрича, Россиянинг Абхазияда база қуриши можаро ҳудудини Грузия чегараларигача кенгайтирмоқчи бўлаётганини англатади.