... 2017 йил – “Халқ билан мулоқот ва инсон манфаатлари йили”
МЕНЮ
ONLINE TV

Футбол мухлислари ўқимасин! Ўзбекистон футболининг келажаги борми?


16:32, 25.09.2017 Спорт
 13 167

Беркитишнинг хожати йўқ, бизнинг маҳаллий футболда жамоадан жамоага ўтиш, ёки маълум таркибга кириш учун “танк” ёки бироз “моддий комплимент” керак бўлади.

Сарлавҳага эътибор берманг... Футбол мухлисларининг куйган юрагини яна куйдирмаслик учун “ўқимасин” дедик.
 
Аслида футболга мухлислик қилиш ҳам бир санъат...
 
Агар миллий терма жамоа ғалаба қозонса, нафақат футбол мухлисларининг, балки барча ўзбекистонликларнинг қалби фахр ва ифтихорга тўлиши шубҳасиз!
 
Агар бунинг акси бўлса-чи?
 
Келинг, “Футбол ҳақида ўйлар” деб номланган туркум мақолалар орқали Ўзбекистон футболининг яқин ўтмиши ва келажак истиқболлари ҳақида фикр-мулоҳазалар юритсак...
 
Жорий йилнинг 5 сентябрь куни Ўзбекистон терма жамоаси ЖЧ-2018 саралаши учинчи босқичида керакли очколарни тўплай олмасдан, 2018 йил Россияда ўтадиган жаҳон чемпионатига чиқиш йўлланмасидан маҳрум бўлди. Жанубий Кореяга қарши ўйинда терма жамоага фақатгина бир гол етишмади.
 
Ҳа, тан олиш керак, ўша маъшум кун Ўзбекистон терма жамоасига бир томондан омад етишмагани, шунингдек, Эроннинг ўз майдонида Сурияга сўнгги дақиқаларда тафовутни топширгани асосий сабаблардан бири бўлди. Бундан ташқари, терма жамоа ўз мухлислари кўз ўнгида сўнгги йиллардаги “кучсиз” деб аталган Жанубий Корея термаси дарвозасига битта гол ура олмади..!
 
Тўғри, терма жамоанинг омадсизликка учраганида бош мураббий Самвел Бабаяннинг нотўғри ўйин услуби танлаганлигини важ қилиб кўрсатиш мумкин. Шу билан бирга, мураббийнинг саралаш босқичи жараёнидаги айрим қайсарликлари — ўлганнинг устига тепган бўлди!
 
Келинг, шу ўринда ортда қолган вазиятга проффесионаларча ёндошайиб, мулоҳаза юритайлик.
 
Биринчидан, Ўзбекистон футболида ТИЗИМ ишдан чиққан!
 
Аслида энг катта хато мана шу. Азиз мухлислар, жумлаларга қўшилмасликка ҳақлисиз...
 
Лекин юқори шароитларга эга бўлган Ўзбекистон футболи аллақачон юқори чўққиларни забт этиш керак эди. Фақат аниқ дастур ва режа асосида иш юритилса, барчаси кутилганидан ҳам аълороқ натижани берарди.
 
Бир сўз билан айтганда, Ўзбекистонда футбол ўйнаш учун шарт-шароитлар кўнгилдагидек. Мухлислар оқими, замонавий стадионлар деярли барча вилоятларда қад ростлаган.
 
Аммо бир савол бор... Ўша замонавий стадионларда қандай футболчилар тўп суришмоқда? Иқтидорли спортчиларми ёки “шунчаки” спортчиларми?
 
Улар қаердан пайдо бўлиб қолишган? Ҳақиқатда ҳам футболчилар жамоада ўз иқтидорлари таъсирида (!) ўйнаб юришибдими, ёки бошқа “нарсалар” эвазигами?
 
Ўзбекистонда ёш футболчиларни танлаб олиш учун скаутлар қўмитаси тузилганми?
 
Ушбу муаммони футболнинг ривожланиши йўлида биринчи ўринга қўйишнинг сабаби шундаки, скаутларсиз футболда ёрқин келажакка етиб бориш қийин.
 
Масалан, чет элда ҳар бир жамоанинг алоҳида скаутлар штаби бор. Негаки, жамоа скаутлар хизматига муҳтож.
 
“Манчестер Юнайтед” скаутлари ўз вақтида Криштиану Роналдудаги иқтидорни пайқашмаганида ким билади дейсиз, ҳозирда дунёнинг энг кучли футболчиларидан бири бугунда Роналду бўла олмасди балки...
 
Криштиану футболдаги профессионал фаолиятини “Спортинг” клубида бошлади, айни кунга келиб, футбол тарихига ўз номини “олтин ҳарфлар” билан муҳрлади.
 
Беркитишнинг хожати йўқ, бизнинг маҳаллий футболда жамоадан жамоага ўтиш ёки таркибга кириш учун “танк” ёки бироз “моддий комплимент” керак бўлади. Фақат шунинг эвазига юқори табақали клубларда футбол ўйнаш имконияти берилади.
 
Айрим футболчилар йиғин пайтида шундай “қинғир йўллар” билан жамоа сафига бориб қўшилишади. Шахсан ўзим бир нечта футболчининг бу ҳақдаги дарду нолаларини кўп эшитганман...
 
Фикримни тўғри қабул қилгайсиз, Ўзбекистонинг турли шаҳарлари, чекка қишлоқлари ва овулларида анчайин иқтидорли ҳаваскорлар бор. Уларда маҳорат ҳам, таъбир жоиз бўлса, отнинг калласидек юрак ҳам, ўзларига ишонч ҳам бор! Фақат аксарияти махсус спорт мактабларида тайёргарлик кўрмаган... Қисқаси, “мактаб кўрмаган” иқтидор эгалари ғиж-ғиж!
 
Улар “отасини пулига” ёки “тоғасининг обрўсига” ишониб майдонга чиқаётган баъзи бир футболчилардан кўп томонлама устун! Фақат улардан Ўзбекистон спорти учун яхши кадрлар тайёрлай олишни эплаш керак холос...
 
Бу кадрлар тайёрлаш, хусусан иқтидор эгаларини излаб топиш юзасидан мулоҳазалар эди. Ҳозирда футболда мавжуд бўлган айрим иқтидор эгаларининг “ўзини кўрсата оладиган майдонга” туша олиш ёки туша олмаслик масаласи ҳам долзарб.
 
Баъзи бир футболчиларнинг Олий Лига жамоасида тўп суриши учун молиявий шароити тўғри келмайди. Мана шундай ҳолатларда бир қанча иқтидор соҳиблари оила тебратиш мажбуриятидан бошқа касбни танлашади.
 
Бир назар солинг, футбол мактабларида кўпроқ кимларнинг фарзандлари таҳсил олмоқда?
 
Шубҳасиз, “мансабдорнинг ёқимтойи” ҳам келажакда яхши футболчи бўлиб етишиб чиқиши мумкин. Бироқ у футболни эмас, шуҳратпарастликни севади, олқишни истайди, “ўртамиёна” бўлиб юраверади, жойи чиқса, хориж клубларида “ўзини кашф этиш учун” кетади, бироқ миллий футбол келажагига, таъбир жоиз бўлса, футболга жонини тикмайди!
 
Бир сўз билан айтганда, яхши футбол ўйнаш илинжида эмас, пул ва сохта обрў топиш ишқида ёнади!
 
Тўғри, молиявий таъминоти яхши бўлган футболчи — иқтидорсиз бўлади, деган гапдан йироқман. Керак бўлса, пулинг бўлса, сен ҳам олиб бор, дерсиз...
 
Лекин фарзандингиз учун пул сарфлаяпсизми — уни назорат остига олишни ҳам унутманг! Спортда, энг аввало, юқори натижа! Бизнес — кейинги масала...
 
Ахир ким ҳам истамайди ўзбекистонлик футболчи “Реал”, “Барселона” ёки “Манчестер Юнайтед” каби катта клубларда ўйнашини?
 
Масалан, шу йили Россияда ўтган Конфедерациялар кубоги мусобақасида Германия терма жамоаси учинчи таркиб билан ғалаба қозонишни уддалади. Кўпчилик бошида Германиянинг ёш таркибига шубҳа билан қараганди. Лекин улар ҳақиқий футболни кўрсатиб қўйишди, масъулиятни ҳис этишди.
 
Ғалабада эса асосий вазифани скаут ва мураббийлар бажаришгани факт орқали исботлаб берилди. Чунки ёш футболчиларни кузатиш учун мураббий скаутга топшириқ беради.
 
Скаут эса изланишлар олиб боради, қидиради. “Қаерда яхши футболчи бор?” деб дунёга жар солади.
 
Лозим бўлса оддий чанг-тупроқдан иборат “майдонда” ўйнаб юрган болага эътибор қаратади, уларни мураббийга тавсия этади. Натижада, қарабсизки, оддий кўча футболчисидан —келажакда етук спортчи етишиб чиқади!
 
Ўзбекистонда-чи?
 
Ким ёш авлодга эътибор қаратяпти?
 
Бизда авлодлар алмашунуви қачон рўй беради ўзи?
 
Хуллас, Ўзбекистон футболининг келажакдаги мавқеи —ҳозирги ёшларга боғлиқ!
 
Терма жамоа эса ўсиб келаётган ёш ҳаваскорларга ўрнак бўла олмади...
 
Шу сабаб асносида ЎФФ раҳбариятидан халқ орасида кўпроқ юриб, истеъдодли ёш футболчиларни профессионаллар даражасига чиқишларида кўмаклашларини сўраган бўлардик.
 
Азизлар, мавзу давом эттирилади.
 
Сизнинг бу борадаги фикр-мулоҳазаларингиз қандай? Кимда оригинал таклифлар бор? Ахир мухлислик қилиш — фақат олқишлаш ёки танқид қилишдан иборат эмас-ку!
 
Таклифларингизни кутамиз...
Акмалхон Эшонхонов

Теглар:ЎФФ футбол ривожи скаутлар 

Дўстларингиз билан бўлишинг:



Ўхшаш мақолалар


Изоҳлар




Изоҳлар

SARVAR
11:31 28.09.2017

Yuqorida aytilganidek fudbolimiz tizimida skautlar tizimi nol darajada. Yurtimiszda haqiqiy talantli jonini beradigan bolla tiqilib yotibti. Talantlarni faqat fudbol maktablaridan akademiyalardan emas kochadan qidiriw kerak. Yurtimizni har bir mahallasida har bir kochasida kocha changitib kopto tepib yurgan talantla bor. Xalqimiza fudbolni ishqibozi. Federatsiya harakat qiliw kereku xaqiqiy jon fido qiladigan bollani topiw uchun. Yoooq ularga faqat puldor oziga toq bolla qiziq. Mana masalan Ronaldino qanday sharoitdan chiqib keldi. Qanday choqqiga chiqdi. Achinarli tomoni wuki o'zbek fudboli qandaydir yuqori lavozimda o'tirgan kishikarning gap soziga qarab iw qilar ekan rivojlanish yana 25 yilda xam bolmaydi. Xalqdan har qancha takliflar bolishi mumkin lekin birontasi ham inobatga ham olunmaydi aksincha teskarisi boladi. Fudbolimiznu aslida bowidan boshlaw shart emas shunchaki haqqoniy va adolatli bolish kifoya.


Улугбек
17:20 26.09.2017

Узбекистон футболини ривожлантириш учун жуда хам куп нарса керакмас. Озгина катъийлик ва ватанпарварлик туйгуси керак, холос. Менинг таклифим жудаям оддий: - ПФЛ мусобакаларида катнашадиган жамоаларнинг аъзолари учун маош тулаш тизимини тубдан узгартириш керак. Мисол учун, Республикада урнатилган энг кам ойлик иш хаки микдоридан келиб чиккан холда маош тулашни жорий килиш керак. Айтайлик, футболчининг катъий белгиланган ойлик маоши энг кам иш хакининг 5 баробари микдорида урнатилади, бунга кушимча бонуслар тизимини киритиш лозим. Жамоанинг уз майдонида эришган галабаси учун + 0,5 баробар микдорида, сафардаги галаба учун +1,0; дуранг учун +0,25; голли пас учун +0,5; гол киритгани учун + 1,0; дарвоза дахлсизлигини саклагани учун +1,0 ва хоказо. Шундай тизим йулга куйилса, уйлайманки футболчиларнинг ойлик маоши фалон-фалон пул булмайди, лекин яшаш, оилани таъминлаш учун етарли булади. Шу холатда футболга факат пул топиш учун кириб колганлар уз-узидан йуколади ва узбек футболида факат фидоий, ватанпарвар ва хакикий футбол учун жонини тикадиган футболчилар колади, мана шундан кейин узбек футболи бирон натижа курсатиши мумкин. Акс холда, "эски хаммом - эски тос" булиб колаверади


Kamoliddin
09:14 26.09.2017

Ўзбекистонимизда футболни ривожлантиришнинг ягона йўли ҳақиқий профессионал футболга ўтишдир."Футбол индустрияси" деган ибора ҳаммага таниш. Футбол миллий иқтисодиётнинг бир бўлагига айланиши лозим. Жамоалар тўлиқ равишда ўз-ўзини молиявий жиҳатдан таъминлашга ўтиши керак. Футбол мухлислари ҳақиқий спорт баҳсини кўриш учун стадионга келадилар. Уларга қайсидир, кимнингдир жамоасини яна кимларнингдир топшириғи билан майдонда устун келишини қизиғи йўқ. Нимага энди маҳаллада бўладиган футбол мусобақасини барча қизиқиш билан кузатадию, ҳайҳотдек стадионлар бўшлигича қолади. Чунки ҳақиқий спорт ҳар доим одамларни жалб этади.


SER11
03:12 26.09.2017

Футболимиз улган булсада УФФнинг хисобот мажлиси ура-урачилик рухида бор йуги бир соатда 4 йиллик ишга якун ясаб юмалок естик килиб утказиб юборилди. Собик президентга зар чопон кийдириш хам эсдан чикмади. Шуларнинг узи футболимиз чукур инкирозга тушганлигига яккол мисол эмасми? Солик туловчиларнинг миллионлаб пуллари сарфи жавобгарсиз колиб кетди. Хеч ким хеч нарсага жавоб бермади! На М. Усмонов, на С. Бабаян! Нега?


begzod
20:35 25.09.2017

battar bolsin uz fudboli uzoqqa boramidi



Биринчи бўлиб ўз фикрингизни қолдиринг!