“Ниқоб тақмаган эдим”. АҚШдаги ўзбек оиласи коронавирусга чалингани ҳақида сўзлаб берди

Жамият

image

Нью-Йоркда яшовчи ўзбеклар томонидан "Кичик Ўзбекистон" деб ном берилган Бруклин туманида яшовчи Эргашевлар оиласининг коронавирусга чалингани аниқланди. Бу ҳақда "Америка Овози" хабар берди.

Таъкидланишича, тошкентлик Улуғбек Эргашев асли навоийлик Меҳринисо Эргашева билан АҚШда 6 йилдан буён яшаб келмоқда. Уларнинг 4 нафар фарзанди бор. Маълум қилинишича, оиладаги ҳамма коронавирусга йўлиққан. Ҳаттоки, 6 ойлик чақалоқлари ҳам.

Меҳринисо коронавируснинг юқтириш сабабларидан бири қилиб, одамлар кўп жойларда тиббий ниқоб тақмаганлигини келтириб ўтди. Унинг айтишича, фақат касал одамлар ниқоб тақиб юриши керак, деб ўйлагани уни ушбу ҳимоя воситасини тақмаслигига сабаб бўлган.

Оила бекасининг маълум қилишича, касаллик аввал томоқдаги қичишиш билан бошланган. Икки кун ўтиб, бутун танада оғриқ пайдо бўлган. 

"Аввал, томоқ қичиши кузатилди. Сўнг бурун оқиши бошланди. Мен оддий тумов бўлса керак, деб ўйлагандим. Икки кун ўтиб, бутун танамда оғриқ пайдо бўлди. Оғриқлар ўтгандан сўнг, йўтал бошланади. Ушбу вақтга келиб ҳид билиш қобилиятим йўқолди", дейди коронавирус юқтирган она.

Меҳринисонинг айтишича, у шифокорга борганида унга коронавирусга чалинганини айтишган. Бироқ ўзбекистонлик аёл бунга ишонмаган. Сўнгра тест топширган. Тестда унда COVID-19 касаллиги аниқланган. 

"Мен шифокорларга оилам ҳам тест топширишини айтдим. Лекин улар аллақачон кеч бўлганини, оила аъзоларимга ушбу вирус юқишга улгурганини айтишди", дейди оила бекаси кўзда ёш билан.

Таъкидланишича, улар уй шароитида шифокорлар билан видеомулоқот орқали гаплашиб, ўзлари даволанишмоқда. Ҳозирда эр-хотин ҳид сезишмаётган бўлса-да, фарзандлари соғайиб бормоқда. Меҳринисо Эргашева буни синов деб ҳисоблаб, Аллоҳдан кўмак сўрамоқда.

 

Мақола муаллифи

Теглар

АҚШ Коронавирус Ўзбекистонликлар

Баҳолаганлар

2153

Рейтинг

3

Мақолага баҳо беринг

Дўстларингиз билан улашинг