Никоҳдан ўтишда ФҲДЁга электрон ариза бериш мумкин

Давлат хизматлар агентлиги никоҳни қайд этиш учун ФҲДЁга электрон ариза намунасини тақдим этмоқда. Ариза берилганидан сўнг, қонунчиликда келтирилган муддат – 1 ой мобайнида хизмат кўрсатилади.

Хизматга кўра, никоҳ тузилганлигини рўйхатдан ўтказиш ҳақидаги аризани олишда ФҲДЁ органлари томонидан никоҳ тузаётган шахсларга тиббий текширувдан ўтиш учун йўлланмалар берилади. Тиббий текширув шифокорлар, психиатрлар, наркологлар, дермато-венерологлар, фтизиатрлар (диспансерлар ва туман кабинетларида) томонидан яшаш жойи бўйича бепул равишда шахсларнинг тиббий муассасага мурожаат этган кундан эътиборан 2 ҳафтадан кўп бўлмаган муддатда ўтказилади.

Хизмат кўрсатиш нархи базавий ҳисоблаш миқдорининг 20 фоизи этиб белгиланган – 44 600 сўм (2020 йил 21 апрель ҳолатига).

Махсус порталда мурожаат қилинган аризалар статистикаси ҳам келтириб ўтилган. Унга кўра, жами аризалар сони 84 та бўлиб, бундан 64 таси рад этилган. Аризаларнинг 4 таси тугалланиб бўлган ва 13 таси айни вақтда жараёнда экани кўрсатиб ўтилган.

Ушбу хизматдан фойдаланиш учун Ягона интерактив давлат хизматлари порталига ягона идентификация тизими (OneID) орқали кириш керак бўлади.