Ўзбекистонда бензин, дизель ёқилғиси ишлаб чиқариш камайган

Ўзбекистон Республикаси Давлат статистика қўмитасининг маълумотига кўра, 2019 йилнинг ўтган 8 ойи давомида мамлакатда автомобиль бензини ишлаб чиқариш ҳажми 11,1 фоизга камайган.

Маълум бўлишича, 2018 йилнинг шу даврида 764,1 минг тонна бензин ишлаб чиқарилган бўлса, 2019 йилда - 679,5 минг тоннани ташкил этган.

Дизель ёқилғисини ишлаб чиқариш ҳажмида ҳам пасайиш кузатилди - 4 фоиз. 2018 йилда 730,1 минг тонна дизель ишлаб чиқарилган бўлса, 2019 йилда - 701,2 минг тонна дизель ёқилғиси ишлаб чиқарилган.

Шу билан бирга, Ўзбекистон 2019 йилнинг 8 ойида нефть қазиб олиш 2018 йилнинг шу даврига нисбатан 6,5 фоизга қисқартирди - 467,2 минг тоннагача нефть хомашёси қазиб олинган.

2019 йилнинг 8 ойида табиий газ қазиб олиш қарийб 40,33 миллиард куб метрни ташкил этди, бу 2018 йилнинг шу даврига нисбатан 0,2 фоизга кўпдир.

2019 йилнинг 8 ойида мамалакатда 1,38 миллион тоннадан ортиқ газ конденсати қазиб олинди, бу 2018 йилнинг шу даврига нисбатан 3,1 фоизга камдир.