Британия қироллик оиласи билан курашган мисрлик миллиардер вафот этди

Миллиардер Муҳаммад Ал Файед 94 ёшида вафот этди. Бу ҳақда “Associated Press” хабар берди.

“Муҳаммад Ал-Файед 30 август куни кексалик чоғида тинчгина вафот этди. У ўз яқинлари қуршовида нафақада узоқ ва мароқли ҳаёт кечирди”, дейилади марҳум оиласининг баёнотида.

У асли мисрлик эди, лекин 60 йилдан ортиқ Буюк Британияда яшаган. Англиянинг “Фулхем” футбол клуби ва Harrods универмагининг собиқ эгаси бўлган миллиардернинг катта ўғли Доди малика Диана билан ишқий муносабатда бўлган ва 1997 йилда у билан бирга автоҳалокатга учраб, ҳалок бўлган.

Муҳаммад Ал-Файед ўғли Доди ва малика Диана қиролича Елизавета II нинг эри шаҳзода Филипп томонидан уюштирилган фитнада ўлдирилганига амин эди. Бироқ британиялик терговчилар жуфтлик ҳайдовчи ва машинани таъқиб қилган папарациларнинг эҳтиётсиз ҳаракатлари туфайли ҳалок бўлган, деган хулосага келди. Францияда ўтказилган алоҳида текширувларда ҳам ҳеч қандай фитна йўқ деган қарорга келинган.

Шунга қарамасдан, Муҳаммад Ал-Файед қироллик оиласи Диананинг мисрлик билан учрашишини ёқтирмагани учун бахтсиз ҳодисани уюштирганини айтган. Ал-Файед Диана ҳомиладор бўлиб, Додига турмушга чиқишни режалаштираётганини ва қироллик оиласи маликанинг мусулмон билан оила қуришига қарши эканини таъкидлаб келган.

2008 йилда Ал-Файед фитна уюштирганлар рўйхатига Филипп, Лондоннинг икки собиқ полицияси бошлиғи ва Марказий разведка бошқармаси бошлиқлари киришини айтган.

Маълумот учун, Муҳаммад Ал-Файед 1929 йил 27 январда Мисрнинг Искандария шаҳрида мактаб инспектори оиласида туғилган. Италия ва Яқин Шарқда логистика соҳасига сармоялар киритгандан сўнг, у 1960-йилларда Британияга кўчиб ўтган ва ўз империясини қуришни бошлаган. Бойлиги чўққисида Ал Файед Париждаги Ritz меҳмонхонаси ва Лондондаги "Фулхем" футбол жамоаси ҳамда "Harrods" ҳашаматли дўконлари тармоғига эгалик қилган.
Британиянинг энг бадавлат кишилари рўйхатини эълон қилиб борувчи “Sunday Times Rich List” нашри бу йил оиланинг бойлигини 1,7 миллиард фунт стерлинг (1,9 миллиард евро)га баҳолаб, Ал Файедни 104-ўринда қайд этган.