Шармандага шаҳар кенг, ёхуд терроризмни тарғиб қилмаса бўлди эмиш
Шоу-бизнес 08 Февраль 45065

“Браво” жамоасининг сўнгги концерти бадиий кенгашга тақдим этилганда, кенгаш томонидан маъқул топилмаган, эътирозли қисмлари сценарийдан олиб ташлаш кераклиги белгилаб берилган эди, — дейди “Ўзбекконцерт” давлат муассасаси директори  Одилжон Абдуқаҳҳоров. — Аммо концертнинг биринчи куни айнан биз тақиқлаган нуқталар ҳам саҳнага олиб чиқилди. Огоҳлантиришдан кейин, иккинчи кундан улар буни тўғри қабул қилган ҳолда сценарийдан чиқариб ташлашди, бу саҳналар бошқа намойиш этилмади. Аммо дискларда биринчи кунги концерт дастури тарқалиб кетди...”

Бугунги кунда кўпчиликдан, айниқса, ўрта ёшлилар, кексалар ва айрим ёшлардан "Миллион", "Браво", "Дизайн" каби жамоаларнинг концерт дастурларига нисбатан танқидий эътирозларни эшитамиз.Тўғри, улардаги ҳазилларни оила даврасида кўриб бўлмайди, халқимиз маънавиятига зид. Лекин, улар концертларини бўш залга тақдим этаётгани йўқ. Ҳатто, 10 сеанслик концертларда 4 минг кишилик сарой тўла турибди. "Ўзбекконцерт" давлат муассасаси Оджилжон Абдуқаҳҳоров бу масалага ҳам тўхталди.

"Биламизки, баъзи таниқли халқ артисти, хизмат кўрсатган артистларнинг концерт дастурларига одам топилмай, чипталарни қайсидир ташкилотларга олиб бориб, сотиб беришни сўрайдилар. Бир нарсани тан олиш керак,  (!) “Миллион”, “Браво” ҳамда “Дизайн” жамолари ўн кун концерт берса ҳам, зал тўла одам, чипта топилмайди". (ХХ аср ўрталарида кичик қутининг тирқишидан яланғоч аёлларнинг суратини кўриш учун ҳам одамлар турнақатор навбатда турган.)

Одилжон Абдуқаҳҳоровга кўра, бу жамоаларнинг айрим ҳазилларидагина чегарадан чиқиш бор экан. 

"Тўғри, бу жамоаларнинг кўп эмас, айрим ҳазилларида чегарадан чиқиш ҳолатлари бор, баъзиларини ростдан ҳам оила даврасида томоша қилиб бўлмайди. Лекин, улар терроризм, диний экстеримизм ва бошқа хавфли мавзуларни кўтараётгани, тарғиб қилаётгани йўқ. Биз уларни ҳеч йўқ фаолиятини тақиқлаб қўёлмаймиз. Улар бугун мамлакат ёшлари эътиборини қозониб бўлди. Аксинча, энди биз бу жамоалардан тўғри мақсадларда фойдалана олишимиз керак, улар социал, долзарб мавзуларимизни кўтариб чиқишларида йўл очиб беришимиз керак", дейди Абдуқаҳҳоров.

Шу ўринда савол туғилади: бу жамоалар мана 5-6 йилдирки фаолият юритиб келяпти. 5-6 йилдирки ўша танқидлар. Лекин, ўзгариш бўлдими? Социал мақсадларда қачон фойдаланмоқчисизлар? Халқ маънавияти йўқ бўлиб, ўша сиз айтган ёшлар кексайгандами? Қолаверса, диний экстремизм ва терроризмни тарғиб қилмаяпти-ку деб, саҳнага чиқиб истаганини айтса, жим қараб қарсак чалиб ўтиривериш керакми?


Дарвоқе, "Ўзбекконцерт" шу кунларда “Браво” жамоаси лицензиясини қайтариб олиш-олмаслик масаласини кўриб чиқармиш. Ҳар ҳолда шундай дейилди. Бу муассасанинг февраль ойи охирида бўлиб ўтадиган йиғилишида муҳокама қилинади. 

Соҳибжамол Каттаева
Мақолага баҳо беринг
Баҳолаганлар: 1165
Рейтинг: 3.4