Баҳодир Жалолов навбатдаги жангини қачон ўтказиши маълум бўлди

Оғир вазн тоифасида ўзбекистонлик профессионал боксчи Баҳодир Жалолов навбатдаги жангини қачон ўтказиши маълум бўлди. Бу ҳақда у ҳамкорликда ишлаётган Top Rank промоутерлик компанияси матбуот хизмати хабар берди.

Манбага кўра, Жалолов навбатдаги жангини 26 август куни АҚШнинг Оклахома штати, Тулса шаҳрида бўлиб ўтадиган катта бокс оқшомида ўтказади. Ўша куни унга ким рақиблик қилиши ҳали номаълум, бироқ жанг асосий карддан ўрин олган. Бу эса унинг эндиги рақиби ҳам рейтинг кўрсаткичлари бўйича ўзидан паст эмаслигини кўрсатади.

Шунингдек, мазкур бокс оқшомининг марказий жанги америкалик Жаред Андерсон (15-0-0) ҳамда украиналик Андрей Руденко (35-6-0) ўртасида кечади.

Маълумот учун,  Баҳодир Жалолов профессионал фаолияти давомида 12 та жангда иштирок этган бўлиб, уларнинг барчасида муддатидан олдин ғалабага эришган. У сўнгги жангини 2022 йилнинг 27 ноябрь куни америкалик Кёртис Харперга қарши ўтказиб, 4-раундда нокаут эвазига ғалаба қозонган эди.

Эслатиб ўтамиз, аввалроқ Баҳодир Жалолов дунёнинг энг номдор Top Rank промоутерлик компанияси билан шартнома имзолаган эди. Шу пайтга қадар Лоу ДиБелланинг DiBella Entertainment компанияси билан ҳамкорликда фаолият олиб бораётган боксчи эндиликда афсонавий Боб Арумнинг мижози сифатида рингга кўтарилади.