Хитойда мактаблар очила бошлади

Хитойнинг мегаполисларида ўрта ва ўрта-махсус мактаблар очила бошлади. Таъкидланишича, эпидемиологик вазиятнинг юмшагани бунга тўлиқ имкон беради.

Маълумотларга кўра, Хитой шаҳарларидаги ўрта мактаб ўқувчилари коронавирус чекингандан сўнг ўқишга қайтишмоқда. Масалан, Шанхайдаги ўрта ва ўрта-махсус мактаб ўқувчилари мактабга ўқув машғулотларини бошлаб юборишган. Пекинда эса кириш имтиҳонларига тайёргарлик кўраётган талабаларга дарсларни давом эттиришга рухсат берилади.

Касаллик маркази бўлган Ухань шаҳрида ўрта мактаблар жорий йилнинг 6 май куни очилиши керак. Хитойнинг бошқа, касаллик кам тарқалган қисмларида мактаблар бир неча ҳафта олдин очила бошлаган.

Сўнгги маълумотларга кўра, Хитойда коронавирус билан боғлиқ 82 836 та ҳолат аниқланган. Касалланганларнинг 77 555 нафари соғайган, 4 633 нафари эса вафот этган. Мавжуд беморлар сони 648 кишини ташкил қилмоқда.