АҚШнинг Украинага ёрдами “қон қуйишга уриниш”дир – Шимолий Корея

Шимолий Корея АҚШнинг Украинага ҳарбий ёрдамини “психотроп модда” ва “қон қуйишга уриниш” деб ҳисоблайди, бу эса кундан-кунга ўз мавқеини йўқотаётган Киевдан қўрқувни вақтинча енгиллаштиради. Бу ҳақда КХДР Ташқи ишлар вазири ўринбосари Им Чхон Ил баёнотида айтилган.

“Мен қатъий айтаманки, АҚШнинг қўшимча ҳарбий ёрдам тўғрисидаги қонун лойиҳаси шунчаки психотроп модда бўлиб, Украинадаги жанг майдонида ҳар куни ташаббусни йўқотаётган Зеленский тўдаси қўрқувини вақтинча енгиллаштиради. Оддий ақл-идрокни йўқотиб, ўз халқини ва барча қимматли нарсаларни мамлакатга сотган, хўжайиннинг тўпи бўлган америкапарастлар ўлимга маҳкумдир", дейилади Корея марказий ахборот агентлигининг унинг сўзларидан келтирган иқтибосида.

Им Чхон Илнинг иддао қилишича, Қўшма Штатлар Зеленский ҳокимиятининг қолган умрини "қон қуйиш" билан узайтиришга уринаётган бўлса-да, бу ўлим азоби остида қолган шерикларнинг тақдирини ўзгартира олмайди.

Аввалроқ Россия ТИВ Киевга ҳарбий ёрдам кўрсатиш Украинадаги можаро ечимини мураккаблаштирганини айтиб чиққанди.

Эслатиб ўтамиз, АҚШ Сенати Украина, Исроил ва Тайванга ҳарбий ёрдам кўрсатиш, Россиянинг музлатиб қўйилган активларини Киевга ўтказиш мақсадида мусодара қилиш, шунингдек, Хитойга қарши қўшимча санкциялар киритиш тўғрисидаги қонун лойиҳаларини маъқуллади.

Пакет ҳажми 95 миллиард долларни ташкил этди, хусусан, Украина учун 61 миллиард доллар, Исроил учун 26 миллиард доллар, шунингдек, можаро зоналари, жумладан, Ғазо секторидаги тинч аҳолига гуманитар ёрдам кўрсатиш учун маблағлар киради. Сенат томонидан маъқуллангандан сўнг, пакет имзолаш учун АҚШ Президенти Жо Байденга юборилади. Америка раҳбари аллақачон уни имзолашга ваъда берган.